Ich hab mers jo gedenkt. Die Ufgahb aussem zwädde Dähl will de Ben net mache. Des versprochene ausgemohlde Bild fer die Vanessa wärrt also ah nix. Sogar Trähne sin gerollt…

Was hot do net des Päcksche vun de Donde Manu gut gedoh! Schnähgerei geht jo immer, awwer diesmohl war ah Spielzeig debei, un e Grußkaht! An die wärrt er sich sicher in e paar Johr gern zurick dengge.

Nohchdem er sich awwer beruhigt hot, hämmer uns de dridde Dähl ohgeguggt. Des war schun widder intressont.

De Blick in unsern Kihlschrank hot awwer gezeigt, Plan B muss her. Unser Eier waren all schun gekocht. Wie so oft im Lähwe is die Oma mol widder die Reddung in de Not. Jetzt blohs noch des rohe Ei heil hähm bringe.